Idazlea

Katalanez idatzi zuen lehen idazle unibertsala eta katalan literarioaren sortzailea izan bazen ere, literatura katalanez idaztea ez zuen berezko helburu gisa ulertzen, latina ezagutzen ez duen irakurle hiritarrengana eta laikoengana iristeko bide gisa, baizik. Hala ere, bere hizkuntzan idaztean, pentsaera zientifikoaren eta espekulazio filosofiko eta teologikoaren aukeretara ireki zuen lehen aldiz hizkuntza hori. Bere katalanak kutsu probentzalak ditu, agian gaztaroan hizkuntza hartan idatzitako amodio poemen ondorioz. Llullek saiakerak eta eleberriak idatzi zituen, eta poeta gisa, trobadoreen teknika lirikoa erabili zuen, hedapena bilatuz. Letrak ez ezik, ikurrak, taulak, figura geometrikoak eta irudiak ere erabiltzen ditu idazteko orduan; esan daiteke bere obren diseinatzaile grafikoa dela. Neologismo batzuk sortu zituen. Oso emankorra izan zen: 265 liburu idatzi zituela uste da, katalanez, latinez eta arabieraz.