Europan eta Mediterraneoko
XIII. eta XIV. mendeetan, Europak eta Mediterraneoak osatzen zuten garai hartan ezagutzen zen ia mundu osoa. Ramon Llull bidaiari nekaezina Europako hegoaldeko hiri askotan bizi eta egon zen, eta baita Afrikako eta Asia Txikiko Mediterraneoko kostaldean ere. Bere bidaien helburuak anitzak ziren: erromesaldiak, aita santuaren babesa bilatzea misioetarako zituen egitasmoetarako, eta baita predikatzeko dialektika praktikatzea ere. «Mallorcako katalan» (bere burua horrela aurkezten zuen) hori mundu erdian ibili zen, bere liburuak gainean hartuta eta idazteari utzi gabe. Bere lanetan data eta lan horiek amaitu zituen tokia idazteko zuen ohiturari esker, ikerlariek «Doktore Argitsuaren» ibilerak irudikatzeko aukera izan dute (zenbait hutsune dauden arren).
